Home || Online tahalka

नेपाली कांग्रेसको १५औँ महाधिवेशनअन्तर्गत निर्वाचन मंगलबार हुने

अनलाइन तहल्का
असोज १२,सल्यान ।

नेपाली कांग्रेसको १५औँ महाधिवेशनअन्तर्गत सोमबार हुने भनिएको निर्वाचन स्थगित भएको छ। स्थगित निर्वाचन मंगलबार बिहान ९ बजेदेखि सुरु हुने गरी नयाँ कार्यतालिका तय गरिएको छ।

शनिबार तय गरिएको प्रदेश सभा र महाधिवेशन प्रतिनिधिको निर्वाचन अविरल वर्षाका कारण सोमबारका लागि सारिएको थियो। सोमबार बिहानैदेखि मतदान हुने भएपछि खलंगामा चहलपहल बढेको थियो। तर, निर्वाचनको तयारी पूरा हुन नसकेपछि सोमबारको मतदानसमेत स्थगित गरिएको छ ।

लगातारको वर्षाका कारण तीन दिनसम्म विद्युत् सेवा अवरुद्ध हुँदा मतपत्र छपाइमा ढिलाइ भएको र आवश्यक तयारी पूरा हुन नसकेको निर्वाचन अधिकृत धीरेन्द्र सापकोटाले जानकारी दिए।

उनका अनुसार विद्युत् सेवा नियमित नहुँदा बेलाबेलामा बत्ती जाने समस्या रहेको र रातिको समयमा मतदान गर्नसमेत असहज हुने भएकाले सबै पक्षसँगको सल्लाहअनुसार सोमबारको निर्वाचन स्थगित गरिएको बताए ।

निर्वाचन स्थगित भए पनि खलंगामा कांग्रेसका नेता, कार्यकर्ता तथा महाधिवेशन प्रतिनिधिहरूको चहलपहल भने कायमै रहेको छ।